Blu ocules (Raconta)

 In jurnales por yunes on sovente trova un rubrica pri drolli litt accidentes. Ci es un tal raconta in Interlingue pri un puella in li lecion de sport. Yo ha originalmen scrit it in Interlingue.

Blu ocules

Hodie noi havet un lecion de sport in li scola. Noi ludet volleyball. Yo ne es un tre bon lusora, ma yo volet aspecter ben, pro que Timo regardat nos. Yo esset secretmen inamorat in Timo. Il esset in mi parallel classe, e noi ambi havet 14 annus. Yo portat mi nov, elegant rubi curt sport-pantalon e mi nigri sport-t-camise. Yo pensat: Yo va monstrar a il que yo posse ben luder volleyball.

Omnicos comensat ben, til li momente quande noi atendet un servicie del altri equip. Li lusora del altri equip besonat mult témpor e mi ocules serchat e trovat Timo. Yo donat a Timo mi max bell subrise por esser cert que il perceptet me.

Ma in ti momente it evenit. Li balle frappat mi visage o plu precis mi dextri ocul in plen rapidité. In prim yo sentit un vertigine e in mi cap omnicos girat e yo devet constatar que mi dextri ocul devenit blu.

Yo stat ta confuset por secondes, ma por me esset quam hores e yo posset vider que Timo ridet pri me e conversat con un altri puella. Mi cordie dolorat presc tam fort quam mi ocul.

Li tot classe ridet e li instructora del sport curret a me e dat me un humid lapp por refriscar mi ocul. Ella questionat me un poc anxiat: „Esque omnicos es in órdine, Aurora?“

Yo inclinat li cap brav, ma yo devet combatter ne plorar pro li dolor e pro li honte e pro li conduida de Timo.

Li blu ocul restat por un tot semane e quelc scoleres mem ridet chascun vez quande ili videt me. Yo decidet que in li futur yo va plu bon atenter durant li volleyball-lude e yo totmen perdit li interesse pri Timo pos ti dolorosi experientie.