Li puella al fenestre (Raconta)

 Li Puella al Fenestre

Maya hat translocat con su familie solmen ante poc dies al old dom ye li margine del cité. Ella havet un nov chambre, quel esset plu grand quam li chambre in li old apartament e nu li familie havet mem un jardin. Solmen li regard ex li fenestre creat un ínquietant sentiment che li puella de decitri annus.

Directmen vis a vis su nov dom esset situat un abandonat dom. Ti vacui edificie fat timore a Maya. It havet opac fenestres, un savagi jardin e un porta, quel aspectet quam it ne esset apertet por un tre long témpor.

Maya ne posset dormir in li unesim nocte pro timore. Ella jacet in li lette e regardat ex li fenestre.

Subitmen ella videt un puella. Ella stat apud li fenestre del abandonat dom. „To ne posse esser ver“, Maya pensat.

Li puella havet circa li sam etá quam Maya. Ella havet long obscur capilles e portat un traditional blanc camise de nocte.

Maya terret. Ella esset presc in panica. „Esque to es fantom?“, ella pensat.

It semblat a ella que li puella videt la. Li puella levat lentmen li manu e fat signes con li manu.

Benque Maya timet mult, ella anc fat signes con li manu al puella in li abandonat dom.

Subitmen li strangi puella subridet e in ti instante li luce extintet se.

In li sequent matine Maya narrat omnicós quo hat evenit a su maxim bon amica Lara.

Lara ja habitat por mult annus in ti parte del cité e conosset it tre bon. Ella esset tre surprisat quande Maya narrat pri li puella.

Lara dit: „Nequí habita ta desde decidu annus“.

Maya replicat: „Esque tu es cert, Lara?“

Lara inclinat li cap e explicat: „Mi matre conosset li homes, qui habitat ta. Lor filia desaparit exactmen ante decidu annus. Ella esset circa in nor etá. Nequí hat trovat la jamá.“

Li cordie de Maya palpitat rapidmen. Ella sentit que ella esset in dangere. Ma Maya ne posset explicar to a su genitores. Ili vell pensar que Maya esset ancor un litt puella, qui timet dormir sol in su chambre.

In li sequent nocte Maya ne volet plu regardar ex li fenestre. Ma quelc minutes ante minocte ella audit un piani frappa.

Frap. Frap. Frap.

„Quo es to?“, Maya pensat e sentit que li timore crescet in la.

Maya esset presc paralisat. Li brue venit del fenestre in su chambre.

Ella apertet lentmen li cortine. Nequí esset éxter.

Ma sur li planca de fenestre jacet subitmen un old foto. Ella esset cert, que it ne esset ci antey.

On posset vider du puellas sur li foto.

Maya reconosset un del puellas strax. Ella esset li puella del abandonat dom.

Sur li altri látere del foto esset scrit: „Lena, deciquar annus. Desaparit desde li 17-im de octobre.“

Maya tornat li foto e su cordie presc cessat palpitar. Apud Lena stat un altri puella. Ella aspectet exactmen quam Maya.

Subitmen it frappat denov. Ma ti vez del altri látere del strada. Maya regardat trans li strada. Li puella stat denov al fenestre. Ma ti vez ella ne monstrat a se self. Ella monstrat vers Maya.

Tande ella scrit per su manus alquó ad sur li ínpur quadre de vite.

Quin paroles: „Tu es li sequent puella.“

Maya recedet e provat criar sin successe. Li voce esset paralisat e ella restat mut e su ocules alargat se mult.

In li instante ella audit un piani rision. Ella tornat se rapidmen plen de timore.

Nequí esset in su chambre. Solmen li grand spegul stat apud su vestiere. Maya regardat ad in li spegul.

E ta Lena stat directmen detra Maya.

Maya volet criar, ma it esset tro tard. Ella esset paralisat e regardat fixmen ad in li spegul. Ma su propri reflection in li spegul ja subridet...

***********************************************************************************

In li sequent matine li chambre de Maya esset vacui. Li puella hat desaparit. Su genitores serchat la in omni loc, ma on ne trovat la.

Solmen li old foto ancor jacet sur li planca de fenestre. Nu on posset ja vider tri puellas sur li foto.

Lena, li ínconosset puella e Maya.

Sub li foto on posset leer: „Qui vide la, es videt.“