Li magical nocte del solsticie (Raconta)

Li magical nocte del solsticie

Raconta da Patricia Schmidt

It esset li die del solsticie: Li max long jorne del annu! Yo esset tre excitat, proque yo hat leet mult in li internet e in old libres pri ancian legendes e mores por ti die. Secun li ancian legendes durant ti nocte magie e secretes deveni vivid denov. Yo sempre hat amat li idé investigar lu ínconosset, benque yo ancor have 15 annus. Ti nocte esset perfect por sentir li special atmosfere de un tal magie.

Li jorne esset tre callid. In li pos-midí yo eat svimmar con mi genitores e mi sestra in li lago. Omnes esset fatigat pro li long jorne e li grand calore, dunc mi tot familie dormit ja ante minocte. To esset mi grand chance! Yo vestit me pianimen e yo furtivmen vadat ex li dom. Nor dom es situat al margine de un forest e yo ineat in li forest quelc minutes pos minocte. Li luce lunari brilliat argentin.

Quande yo eat plu profundmen in li forest mi excitation crescet plu e plu. Li ciel esset clar e li stelles splendet lucidmen. Yo clúdet mi ocules e respirat profundmen. Yo volet sentir li nocte. Yo juit li frisc e clar aere del estive in ti magical nocte. Subitmen yo sentit un strangi frigore in li aere, benque it esset un callid nocte estival. Yo audit un brue in li boscage. Yo apertet strax mi ocules. Yo videt in li ombre del forest un brilliant ente. Quo esset to? Un hom o un animale o fórsan mem un fantome? Yo sentit un mixtura inter excitation e timore. Yo regardat al ti ente fixmen. It semblat a me que it consiste ex luce e ombre e su ocules brilliat sinistrosimen, presc hipnotical. Yo esset quam paralisat e lentmen li ente movet se vers mi direction! Yo ne posset creder quo to yo videt. Yo sentit un grand frigore in mi córpor.

Mi cordie palpitat plu rapidmen, ma in li sam témpor yo sentit un cert fascination por to quo evenit. E subitmen li ente comensat parlar. Su voce esset rauc e sonat quam un obscur susurrada. Su paroles esset misteriosi: „Li nocte celat mult secretes, ma ne omni secretes es por te, Patricia!“ Yo glotit e sentit un mixtura inter timore e curiositá, quel yo ne posset controlar. Li paroles resonat in mi cap durant li ente aproximat se vers me plu e plu. Li ente havet li forme de un árbor, quel esset capabil marchar. Yo volet parlar, ma yo ne posset aperter mi bocca. Yo anc ne posset mover, to significat que yo ne posset escapar. Li ente havet un manu quel aspectet quam li radica de un árbor. Un frigid fingre tuchat mi guancie. Yo volet criar, ma yo ne posset. Per li contacte con li ente yo sentit un calore sur mi visage. E li ente dit a me: „Nu tu es marcat, Patricia!“ Quo to significat? Yo volet questionar, ma yo ne posset aperter mi bocca.

Subitmen un mild luce extendet se circa li ente e in ti momente it hat desaparit tam rapidmen quam it hat aparit antey. E li nocte devenit denov quiet. Yo stat sol in li forest e restat ta por quelc minutes  íncaptabil de mover me. Yo respirat profundmen e provat comprender to quo hat just evenit. Yo savet que alquó ha alterat. Un nocte plen de magie e secretes e omnicos esset real! To ne esset plu legendes in libres o filmes. Yo eat a hem lentmen e atentivmen.

Ye li sequent matine, quande li sole ascendet, yo sentit me altrimen. Li misteriosi eveniment esset quam un somnie, ma li memorie esset vivid in me. Yo savet que li solsticie esset un torne in mi vive. Nu yo esset marcat, li enigmatic ente hat dit. Yo ne save til hodie quo to significa. Ma yo nequande va obliviar ti solsticie, it esset un nocte de magie e secretes. Un nocte in quel li frontieras inter li realitá e magie esset dissoluet.